Shaban Ke Mahine Ki Fazilat

March 29th, 2021

Hadees-e-Mubarika mein shaban ki fazilat ka zikr aya hai. Is post mein shaban aur is mahine ki 15 tareekh ki khas fazilat aur zikr-o-ibadat ke bare mein bat karenge.

Shaban Ke Mahine Ki Fazilat Aur Shab-e-Barat Ki Ibadat

Sha’aban Ki Haisiyat Kya Hai?

Ek riwayat main Nabi Kareem SallALLAHu ‘Alayhe Wasallim ne is mahine ko apna mahina qarar dia hai, chunache farmaya:

Sha’aban mera maheena aur Ramadan ALLAH Ta’ala ka maheena hai.

Ye bhi dekhiye→ Shab e Barat Ki Ibadat Ka Tarika

Sha’aban Ko Sha’aban Kyon Kahte Hai?

Hazrat Anas R.A. farmate hain:

Sha’aban ko “Sha’aban” is liye kaha jata hai kyunke is mai roza rakhne wale ke liye buhat si khairen aur bhalaiyan (shakhon ki tarah) phootti hain, yahan tak ke wo jannat mai jaa puhanchta hai.

Is mahine mai aamal ki paishi hoti hai, chunache Hazrat Osama bin Zaid R.A. se riwayat hai ke Nabi Kareem SallALLAHu ‘Alayhe Wasallim irdhad farmate hain:

Rajjab aur Ramadan ke darmiyan jo Sha’aban ka maheena hai (aam tor par) log us se gaflat ka shikar hote hain, halanke is maheene mai bando ke aamal ALLAH Ta’ala ke huzoor paish kiye jaate hain.

Hazrat Anas R.A. se marwi hai ke jab Rajjab ka mahina dakhil hota to Nabi Kareem SallALLAHu ‘Alayhe Wasallim yeh dua parha parha karte the:

“ALLAHumma Barik Lanaa Fee Rajaba, Wa Sha’abana, Wa Ballaghnaa Ramazana”

“Ae ALLAH! Rajjab aur Sha’aban ke maheene mai hame barkat ata farma aur hame (bakhair-o-aafiyat) Ramadan-ul-Mubarik tak puhancha dijiye.

Ye bhi dekhiye→ Ya Zal Jalali Wal Ikram

Shaban Ke Mahine Ki Fazilat

Pehli Fazeelat: Bakasrat Logon Ki Maghfirat

Is shab mai ALLAH Ta’ala be-shumar logon ki magfirat kar dete hain, chunache Hazrat A’isha Siddiqua R.A. Nabi Kareem SallALLAHu ‘Alayhe Wasallim ka yeh irshad naqal farmati hain ke beshak ALLAH Sha’aban ki pandraween shab main aasmaani dunya par (apni shaan ke mutabik) nuzool farmate hain aur qabeela “Kalb” ki bakriyon ke balon ki ta’adad se bhi zyada logon ki magfirat farma dete hain.

Qabeela “Banu Kalb” arab ka ek qabeela hai jo bakriyan kasrat se rakhne mai mashoor tha, aur bakriyon ke balon ki ta’adad se zyada magfirat karne ke do matlab zikr kiye gae hain:

  1. Pehla matlab yeh hai ke is se gunahgar murad hain, ya’ani is qadar kaseer gunahgaron ki magfirat ki jaati hai ke jin ki ta’adad un bakriyon ke balon ki ta’adad se bhi zyada hoti hai. Aur is ka hal yeh hai ke be-shumar logon ki magfirat hoti hai.
  2. Dusra matlab yeh bhi bayan kia gaya hai ke is se gunahgar nahi balke gunah murad hain, yaani agar kisi ke gunah banu kalb ki bakriyon ke balon se bhi ziada hon to ALLAH Ta’ala apne fazal se ma’af farma dete hain.

Dusri Fazeelat: Duaon Ki Qabooliyat:

Yeh raat dua’on ki qabooliyat wali raat hai, is mai ALLAH Ta’ala se mangne wala mehroom nahi hota, balke khud ALLAH Ta’ala ki janib se sada lagai jaati hai ke koi mujhse mange mai unki maang puri karun, jaisa ke hadees mai ata hai,

Hazrat Ali Nabi Kareem SallALLAHu ‘Alayhe Wasallim ka yeh irshad naqal farmate hain:

Jab Sha’aban ki pandraween shab ho to uski raat mai qayam (ibadat) karo aur uske din mai roza rakho, beshak ALLAH Ta’ala is raat mai ghuroob-e-shams (suraj doobne) se he asmaani dunya mai (apni shan ke mutabik) nazool farmate hain aur kehte hain:

  • kya koi mujhse magfirat chahne wala nahi ke mai uski magfirat karun?
  • Kya koi rizk talab karne wala nahi ke mai usse rizk ata’a karun?
  • Kya koi musibat-o-pareshani mai mubtila shakhs nahi ke mai usse ‘afiyat ‘ata karun?
  • Kya falan aur falan shakhs nahi… yahan tak ke (isi tarah sada lagte lagte) Subah sadiq tul’oo hojati hai.

ALLAH Ta’ala ki janib se yeh ‘Ata aur bakhshish ki sada rozan’a raat ko lagti hai aur b’aaz riwayaat mai raat ke ek ek tanhai hissay ke guzar jane ke baad subah tak lagti hai aur b’aaz riwayaat mai raat ke akhri peher y’ani akhri tihai hissay mai lagai jati hai jaisa ke tirmizi shareef ki riwayat mai is ka zikr hai, lekin is shab-e-barat ki azmat ka kya kehna!

Ke is raat mai shur’u hi se y’ani aaftab ke guroob hone se le kar subah sadiq tak yeh sada lagai jati hai, lihaza in qabooliyat ki gharyon mai gaflat mai soye pare rehne se bachna chahye aur ALLAH Ta’ala ki janib ruj’u karte hue shauk-o-zauk ka izhaar karna chahye.

Teesri Fazeelat: Saal Bhar Ke Faislon Ki Raat:

Is raat ki ek ahem fazeelat yeh hai ke is mai saal bhar ke faisle kiye jaate hain ke kis ne paida hona aur kis ne marna hai kis ko kitna rizk dia jaega aur kis ke sath kia pesh aega, sab kuch likh dia jata hai.

Chunanche Hazrat A’isha Siddiqua R.A. farmati hain ke Nabi Kareem SallALLAHu ‘Alayhe Wasallim ne farmaya:

Ae ‘Aisha! Kia tum janti ho ke is pandarween shab mai kia hota hai?

Maine arz kiya ya RasoolALLAH kya hota hai? Ap ﷺ ne irshad farmaya:

Bani Adam mein se har ek shakhs jo is saal paida hone wala hota hai is raat mein likh diya jata hai, Aur bani Adam mein har ek shakhs jo is saal marne wala hota hai is raat mein likh diya jata hai, aur is raat mein bandon ke aamaal utha liye jate hai aur isi raat mein bandon ke rizq utarte hai.

(Mishkaat-ul-Musabeeh : 1305)

Ek riwayat mai Nabi Kareem SallALLAHu ‘Alayhe Wasallim ka yeh irshad manqool hai:

Ek sha’aban se dusre sha’aban tak ‘Umren likhi jaati hain, yahan tak ke koi shakhs nikah karta hai aur us ki aulad bhi hoti hai lekin (usse m’aloom tak nahi hota ke) us ka naam murdon mai nikal chuka hota hai.

Shaban Mein Dua Qubul Hone Ke Sharait

Pehli Shart: Haram Se Ijtinab

Hadees ke mutabik jis ka khana peena aur libaas wagairah haram ka ho us ki du’a qabool nahi hoti, chunache Hazrat Abu Hurairah R.A. farmate hain ke Nabi Kareem SallALLAHu ‘Alayhe Wasallim ne ek shakhs ka tazkirah kia jo taweel safar karta hai aur us ki wajah se wo pura ganda aur gubar aloodah ho jata hai aur is par gandagi ki halat mai apne hath ALLAH Ta’ala ke samne phaila kar kehta hai: Ae mere parwardigar! Ae mere parwardigar! Halanke us ka khana, us ka peena, us ka libaas sab haram ho aur us ki parwarish haram maal se ki gai ho to us ki du’a kaise qabool ki ja sakti hai.

Dusri Shart: Tawajjoh Se Dua Karna

Yaani dil ki tawajjah se ALLAH Ta’ala se du’a karna, aisa na ho ke gaflat mai sirf ratte ratae du’aiya kalmat zubaan se ad’a kiye jaen aur dil hazir na ho, kyunke hadees ke mutabik aisi gaflat ke sath mangi ke sath mangi jane wali du’a qabil-e-qabool nahi hoti. Chunanche Hazrat Abu Hurairah R A. Nabi Kareem SallALLAHu ‘Alayhe Wasallim ka yeh irshad naqal farmate hain: ALLAH Ta’ala se qabooliyat ke yaqeen ke sath du’a manga karo aur jaan lo! Ke ALLAH Ta’ala gaflat aur la-parwahi mai pare hue dil ke sath du’a qabool nahi farmate. Ye bhi dekhiye→ How to Ask ALLAH For Something You Really Want?

Mah-e-Shaban Mein Shab-e-Qadr Mein Kya Karna Chahiye?

Shaban ki dua allahumma innaka afuwwun tuhibbul

Tariqa Hadees Mein

Do raka’at Salat ul Taubah parh kar sachi taubah karen, apne gunaho par sharmindagi o nadamat ke sath ALLAH Ta’ala se sadqa e dil se m’afi mange. Chunanche shab-e-qadr ke bare mein Hazrat ‘Aisha R.A. ke jab Huzur ﷺ se sawal kiya ke ya Rasoolullah ﷺ agar main shab-e-qadr paa loon to usme kya parhu to ap ﷺ ne unko koi bada zikr ya koi badi namaz ya tasbih parhne ke liye nahi kaha balke ek mukhtasar aur asan si dua talqeen farmayi, jisme uf’u darguzar ki darkhwast ki gayi hai.

“ALLAHumma Innaka ‘Afuwwun Tuhibbul ‘Afwa Fa’afu ‘Anni”

Ae ALLAH! TU Bahut Ma’af Farmane WALA Hai, Ma’afi Ko Pasand Farmata Hai, Pas Mujhe Ma’af Farma De!

Isse malum hua ke ba-barkat raaton mein sabse bada karne ka kaam jo amooman log nahi karte aur makhsoos qism ki khud sakhta namaz parhne ke peechhe lag jate hai wo ye hai ke apne maazi ki zindagi par sachche dil se sharmsaar hokar, ayindah amalan tabdeeli lane ka sachcha irada lekar tawbah aur astaghfaar kiya jaye, yeh amal mubarak raton ki barkat ko sametne ka sab se ahem aur saheeh tareeqa hai.

 

Is post ko apne pyaron se zarur share kijiyega aur iska sawab-e-jariya hasil kijiyega.

Join ya ALLAH Community!

FaceBook→ yaALLAHyaRasul

Subscribe to YouTube Channel→ yaALLAH Website Official

Instagram par Follow Kijiye instagram.com/yaALLAH.in

18 Comments

  1. Huma on said:

    Assalamualaikum Bhai Ehtakaf ke Rules or Regulations or Ehtakaf mein padhne ki khas duaye bta dijiye…

  2. Hifi on said:

    Aoa imran bhai mujhay bata dain ijazat dy dyn ma Surah Muzammil 41 times parh sakti hu awwal akhir 11 11 br Darud Pak k sath?? Ma ne facebook pr yeh wazifa prha ha k 11 din tak parhna ha or ijazat lazmi ha

  3. Fia on said:

    Imran bhai yaqeen janiye ma ne aisa qadam nhi uthaya abi tak na uthaun ge In Sha Allah. Bus dua kryn mere liye

  4. Umme Salmah on said:

    Assalamualaikum brother…help me out from my worse situation I was in relationship and now I got realized and I wanted to break it but the person with whom I was in relationship he doesn’t want to break and he is now even blackmailing that he would do mess and worsen my life
    I’m unable to do anything… please help me out with this

  5. Sheerin on said:

    Assalamu walikum bhaiah . Kya kun faya kun namaz aaj ki shabe be raat ko padh sakthe hi kya . Aur aaj ki raat kya kya namaz padhna thoda bolo na plzzz mujhe aulad hone ke liya padhna chahti hu plzzz bhaiah reply diyo

    • Ji bilkul sis parh sakte hain. Kuch bhi ibadat jo aap karna chahen kar sakte hain.

  6. Fia on said:

    Aoa imran bhai ma ne aik baat puchni thi k mujhay mere boss sy pyar ha q k unho ne mujhay namaz Quran or achi cheezon ki taraf mail kiya..ma unsy shadi krna chahti hu lekin ek masla ha k wo married hyn or unk 2 bachay hain. Lekin ma hr giz unki family ka bura nhi chahti ye Allah pak janta ha. Mujhay koi aisa wazifa bata dain k unsy shadi hou jay? Unho ne pehle mujhay shadi k liye purpose kiya tha lekin ma ne mana kr diya tha k kahin unki family na kharab hou jay lekin mje kafi attachment ho gai ha unse

    • Kisi ka ghar kharab ho, aisa qadam nahi uthana chahiye sis.

  7. Almas Khalid on said:

    Meray 3 lakh aik admi nahi day raha wo meri mehnat ki kamai hai mai bohat pareshan hoon mai kiya karoon keh wo meray paisay day day

  8. A on said:

    Neem waly wzefy mn neem ki jga drekh istamal kr skty hn?

  9. Aamir Ashraf khan on said:

    Assalam-u-alaiqum bhai,
    Me ne aap ko 2 din phele comment me apni masliyat bttai thi fir messanger pe bhi msg kiya lkn kch jawab nhi aaya or dubara jab messanger pe msg kr raha hu to failed btta raha hai. Mera naam Aamir Khan hai.

    • Bhai aap 6:30-8:30 pm india time par message karen.

Apne sawal yahan puchiye!