Ghusl Karne Ki Dua Aur Niyyat

October 20th, 2021

Ghusl karne ki dua kya waqayi hoti hai? Ghusl ek arbi lafz hai jiska matlab hota hai ghilazat ya najasat door karna. Jo ham Nahakar pakeezgi hasil karte hai. Yani islam mein ham ghilazat ya najasat door karne ke liye nahate hai karte hai.

Ghusl Karne Ki Dua Aur Niyyat

Ghusl humare rozana ka mamool hai par ghusl ka sunnat tareeqa kya hai? Ghusl ke farz kitne hain? Ghusl ke mustahab kya hain?

Hum is bare mein tafseel se janenge aur Insha ALLAH ghusl karne ke do (2) tareeqe janenge. Zarur dekhiye→ Bazar Me Jane Ki Dua

Har balig musalman jab napaak ho jaye to uspe ghusl farz ho jata hai. Agar wo shakhs ghusl na kare to gunahgar hoga.

Humare Nabi-e-Kareem Mu’hammad ﷺ ne farmaya:

“Ghusl imaan ka adha hissa hai.”

[Sahih Muslim]

Ghusl imaan ka adha hissa isliye hai kyon ki Islam ek pakeezah mazhab hai. Agar koyi musalam napaak ho to, wo na to Namaz ada kar sakta hai na Qur’an ki tilawat kar sakta hai.

Aur chhoonke namaz ek baligh musalman par farz hai. Isliye paak rehna bhi musalman par farz qarar diya gaya hai.

Islam pakeezgi ko itni tawajjuh isliye bhi deta hai kyonki, gangdi ya najasat mein rehne se insan ko tarah-tarah ki beemariyan hoti hai. Aur insan dekhne mein bhi ganda maila kuchaila dikhe to yeh to zillat (beizzati) ka ek sabab banega.

ALLAH Ta’ala ne Qur’an-e-kareem mein irshad farmaya hai:

اِنَّ اللّٰهَ يُحِبُّ التَّوَّابِيۡنَ وَيُحِبُّ الۡمُتَطَهِّرِيۡنَ‏

InnALLAHa Yu’hibbut-Tawwabeena Wa Yu’hibbul Muta-tahhareena

“ALLAH tauba karne walo aur paak rehne walo ko pasand farmata hai.”

[Surah Baqarah | Ayat #222]

Ghusl Karna Kab Farz Ho Jata Hai?

Jab bhi insan kisi bhi wajuhat se napaak ho jaye uspe lazim hai ki wo jald-az-jald ghusl karke paaki hasil karle. Zarur dekhiye→ Ghar Se Nikalne Ki Dua

Ghusl Toot Jane Ke Kuchh Wajuhat

  1. Ehtalam hone pe;
  2. Humbistari ke baad;
  3. Aurat ko jab haiz aaye;
  4. Nifaas hone ke bad;
  5. Kisi wajah se napaak ho jane ke wajah se.

Tafseel

  1. Ehtalam, yani jab sote huye mani nikal jaye, to aise mard aurat dono pe ghusl karna wajib hai.
  2. Shohar aur biwi ke beech jo jismani taluqqat qayem ho, is halat ko humbistari kehte hain. Aur humbistari ke bad ghusl karna wajib ho jata hai.
  3. Aurat ko har mahine jo khoon ata hai use haiz/mahwari kehte hain. Ye kam se kam teen (3) aur zyada se zyada das (10) ek aurat ko aata hai.

Kuchh auratein aisa manti hain ke agar haiz teen (3) din mein khatm ho jaye phir bhi aurat saatwein (7) din naha kar paak hogi, ye ghalat khayalat hain.

Jaise hi ek aurat ka haiz ka khoon aana band ho jaye uspe ghusl karna wajib ho jata hai. Aur Namaz bhi farz ho jati hai.
Halanki haiz ke dauran Namaz maaf hai aur un namazon ki qaza bhi nahi ada karni padti hai.

  1. Nifaas, ek aurat ko jab aulad hoti hai to, kam se kam bees (20) aur zyada se zyada chalees (40) din jo khoon jaari hota hai use nifaas kehte hain. Zarur dekhiye→ Safar Ki Dua in Hindi

Nifaas ka khoon bhi jab ek aurat ko aana band ho jaye to uspe lazim hai ki, wo naha dhokar paak ho jaye aur Namaz ada karna shuru kar de. Kuch auraton ka yeh manna hai ki chalees (40) din tak to aurat napaak hi rehti hai. Ye tareeqa aur khayalat ghair islami hai.

  1. Kisi tarah ki napaaki ya najasat jism par lag jaye, jaise ki koyi khane peene wala bacha peshab kar de. To us shakhs par bhi ghusl wajib ho jati hai.

Upar bataye gaye tamam wajuhaton se ek insan ka ghusl toot jata hai. Yani ke wo napaak ho jata hai. Aise halaat mein us shakhs pe lazim hai ke wo ghusl karke paaki hasil karle khwah wo mard ho ya aurat. Zarur dekhiye→ Musafir Ki Dua

Ghusl Ke Farz Kitne Hain?

Ghusl ke teen (3) farz hain. Aur agar inko ada na kiya jaye to paaki hasil nahi hogi.

  1. Kulla Karna

Teen (3) martaba kulla ya garara achhe tareeqe se kiya jaye taaki pani halak tak pahunch jaye.

  1. Naak Mein Pani Dalna

Naak mein bhi teen (3) martaba pani dalkar achhe se naak saaf karna.

  1. Poore badan par paani bahana

Yani ke ghusl ke dauran insan achhe se pani dale badan par, ke jism ka ek (1) kona bhi na chhote, kyon ki agar ek (1) baal barabar jagah bhi chhoot gayi to paaki hasil nahi hogi.

Ghusl Ki Sunnatein Kya Hai?

  1. Dono hath gatto (kalayi) tak dhona;
  2. Poore badan par teen (3) bar pani dalna;
  3. Aur dahini janib se shuru karte huye ghusl karna.

Ghusl Ke Mustahab Kya Hain?

  1. Ghusl ke dauran baatein na karna;
  2. Qibla ke tarf rukh karke ghusl na karna;
  3. Ghusl ke dauran kisi dua ka zikr wagairah na karna.

Najasat Do Tarah Ki Hoti Hai

  1. Najasat-e-Ghaleezah (Bhari Najasat)

Bhari najasat jaise ki, ehtalam hona; humbistari karna; haiz aur nifaas ka khoon ya phir khane wale bachhe ka peshab, aise najasat ko Najasat-e-Ghaleezah kehte hain. Zarur dekhiye→ Doodh Peene Ki Dua

  1. Najasat-e-Khafeefah (Halki Najasat)

Peshab ke chheente waghairah pad jana; chhote bachhe (Jo khana khate ho) ka peshab waghairah, aisi najasat ko Najasat-e-khafeefah kehte hain.

Nabi-e-Kareem Mu’hammad Mustafa ﷺ Ke Ghusl Ka Tareeqa

Hazrat Maimoona RadiALLAHu ‘Anha se riwayat hai:

“Maine Nabi-e-Kareem Mu’hammad Mustafa ﷺ ke liye ghusl ka pani rakh diya. Unhone sabse awwal apne hath do (2) ya teen (3) baar dhoye, apni sharmgaah bayein hath se dhoyi phir apne bayein hath ko mitti pe ragda. Kulla kiya aur phir naak mein achhi tarah se pani daalkar naak saaf ki, apna munh dhoya aur kehuni tak apne hath dhoye. Aur uske bad apne poore jism par pani bahaya, akhir mein us jagah se hat kar apne dono paon dhoye.”

[Sahih Bukhari Hadees #257]

Hazrat Maimoona RadiALLAHu’Anha se riwayat hai:

“Huzoor-e-Aqdas ﷺ janabat (humbistari) ke baad ghusl kar rahe the. Unhone sabse awwal apne sharmgah ko apne bayein hath se dhoya phir apna baayan hath dhoya. Uske baad wuzu kiya jaise namaz ke liye karte hain aur phir poore badan par pani dalkar naha kar, akhir mein apne paon dhhoye.”

[Sahih Bukhari Hadees #260]

Ek Hadees Jisme Nabi-e-Kareem Mu’hammad ﷺ Ne Haiz/Mahwari Ke Bad Nahane Ka Tareeqa Bataya Hai

Hazrat ‘Aisha RadiALLAHu ‘Anha se riwayat hai:

“Ek aurat ne Nabi-e-Kareem Mu’hammad Mustafa ﷺ se haiz khatm ho jane ke baad kaise ghusl kiya jaye, iska tareeqa puchha.

Nabi Paak ne farmaya:

“Ek kapre par mushk laga kar khud ko paak karo.”

“Us aurat ne puchha ya RasoolALLAH kaise paak kiya jaye”?

Nabi-e-Kareem Mu’hammad ﷺ ne farmaya:

“SubhanALLAH! Khud ko saaf karo.”

Phir maine us aurat ko apni taraf kheench liya aur bataya ke, khoon ke maqam ko us kapde ke tukde se saaf karo.”

[Sahih Bukhari Hadees #314]

Ghusl Ke Do (2) Tariqe Hain

  1. Sunnat Tareeqa

Sunnat tareeqa yeh hai:

Insan sabse awwal teen (3) dafa hath dhoye (kalayi tak) phir apne bayein hath se apni sharmgaah dhoye. Uske baad wuzu kare. Aur phir sar par teen (3) baar pani dalkar poore jism par pani bahaye, aur akhir mein apne paon dho le.

Ghusl ka sunnat tareeqa sabse afzal hai. Kyon ki aise nahane pe ek shakhs ko paaki bhi hasil hogi aur sunnat ki adayegi ada karne ke sabab (wajah) se neki bhi milegi. Zarur dekhiye→ Sadaqah Ki Dua

  1. Sirf Ghusl Ki Farayiz Ada Karke Ghusl Karna

Ghusl ke teen (3) farz hain. Agar koyi shakhs un teen (3) ko ada karle to use paaki hasil ho jayegi. Aur agar usne ek (1) bhi farz chhor diya to paaki hasil na hogi.

Jab koyi shakhs ghusl ke liye jaye to, sabse awwal teen (3) dafa apne hath gatto (kalayi) tak dhoye phir apne bayein hath se apni sharmgaah dhoye. Uske baad teen (3) baar kulla kare aur teen (3) baar naak mein pani dale. Aur phir poore jism par pani bahaye.

Is tareeqe se ghusl karne se bhi napaak shakhs ko paaki hasil ho jayegi. Lekin choonke yeh sunnat tareeqa nahi to hai to us shakhs jo sunnat ada karne ka ajar nahi milega.

Ghusl Karne Ki Niyyat Aur Uska Tariqa

Yahan Dekhiye:

Jaisa ke hum upar Hadees ki roshni mein ghusl ka tareeqa aur ghusl ke farz; sunnat; mustahab jaan chuke hain.

Lekin hamein ghusl kaise kare uska tariqa yahan tafseel se padhenge.

  1. Niyyat Karna

Ghusl se pehle chahe to zuban se niyyat ki ja sakti hai ya phir dil mein bhi karlein to kaafi hai. Aye ALLAH! Main ghusl kar raha/rahi hoon pakeezgi hasil karne ke liye.

  1. Bismillah Padhna

Bismillah padh lein kyon ki Bismillah padhne se shayateen aur insan ke sharmgaah ke darmiyan ALLAH parda daal deta hai.

  1. Agar aap Najasat-e-Ghaleezah (Hari Najasat) se paaki ke liye naha rahe hain to aap pe lazim hai ki sunnat tareeqe se ghusl karein.

Sabse awwal teen (3) martaba gatto (kalayi) tak apne hath dholein. Uske baad baayein hath se apni sharmgaah dholein.

Phir wuzu banayein jaise namaz ada karne ke liye banate hain. Uske baad dahini janib (taraf) se sar par pani dalna shuru karien.
Teen (3) martaba pani dalein aur phir poore jism par achhe se pani dalkar nahalein.

Aur humare is daur mein, ALLAH ne hume sabun waghairah ki sahulat di hai to sabun se nahayein aur baalon mein shampoo karlein. Aur khud ko achhe se mal-mal kar nahayein.

Akhir mein apne paon dho lein.

Najasat-e-Khafeefah (Halki Najasat) Se Ghusl Karne Ka Tareeqa

Agar koyi shakhs halki najasat se paaki ke liye ghusl kar raha hai. To wo shakhs agar sirf ghusl ke farz ki adayegi bhi kar de to paaki hasil ho jayegi Insha ALLAH, zaroori nahi ke sunnat tareeqe se ghusl kiya jaye. Zarur dekhiye→ Tera Teji Kyon Manate Hain?

  1. Niyyat Karna
  2. Bismillah padhna
  3. Sabse awwal hath gatto (kalayi) tak teen (3) martaba dholein. Phir apne bayein hath se apni sharmgaah dhoyein.

Uske baad teen (3) baar kulla kare aur teen (3) baar naak mein pani dale. Aur dahini janib se shuru karte huye sar se lekar pair tak pani bahayein ke jism ka ek qatrah (hissa) baaqi na rahe. Aur aap chahe to sabun waghairah laga kar nahaye kyon ki aaj ke daur mein ALLAH ne hume in ne’maton se nawaza hai.

Is tareeqe se ghusl karne par ek shakhs ko paaki hasil ho jayegi Insha ALLAH.

Ghusl Karne Ke Baad Ki Dua

Ghusl karne ki dua allahummaj alni minat tawwabina

Ghusl karne se pahle ya bad ki koi aisi khas dua hadees-e-mubarika se sabit nahi hai. ke baad ki koyi dua nahi hoti. Kisi Hadees mein iska zikr nahi aaya hai. Lekin agar aap is dua ko padhna chahe to padh sakte hain. Yeh dua Hisnul Hasan mein maujood hai. Aur iske padhne se Insha ALLAH ajr-o-sawab milega. Zarur dekhiye→ Khana Khane Ki Dua

Dua yeh hai:

اللَّهُمَّ اجْعَلْنِي مِنَ التَّوَّابِينَ وَاجْعَلْنِي مِنَ الْمُتَطَهِّرِينَ

ALLAHumma Aj’alnee Minat-Tawwabeena Wa Aj’alnee Minal-Mutatahhareena

Aye ALLAH! Mujhe maafi mangne walo aur paak rehne walo mein se bana de.

[Hisnul Haseen]

Ghaur Talab:

  1. Jab bhi ghusl ke dauran naak saaf karni ho to bayein hath ka istemal kare. Aur najasat dhhone ya sharmgaah dhone ke liye bhi baayein hath ka hi istemal karein. Zarur dekhiye→ Ghabrahat Ki Dua

  2. Agar koyi shakhs Ramzan ke din mein ghusl kar raha hai to, kulla halke tareeqe se kare jisse ke pani halak mein na jaye.
    Kyon ki halak mein pani jane se roza toot jayega.

  3. Auratein agar jooda bandh kar ghusl kar rahi hain to, jooda kholkar ghusl kare taaki pani baalon ke jad tak chala jaye.
    Jism ke ek qatrah bhi sookha reh gaya to ghusl na hoga.

  4. Agar mard ho ya aurat aapne koyi anghoothi (ring) pehan kar rakhi hai to usko utaar kar ghusl kare.

  5. Auratein jinhone nakhun-polish lagayi hai unke liye bhi zaroori hai. Pehle nakhun-polish hatayein.
    Kyon ki wo polish pani ko nakhun tak pahunchne se rokta hai. Aise halaat mein ghusl nahi hoga, aur wo shakhs napaak hi rahega.

  6. Auratein jinhone kaan ya phir naak mein kisi qism ke zewar pehne hain. Use bhi utar kar ghusl kare ya phir ghusl karte waqt use ghuma kar pani us hisse mein pahunchaye.

Ghusl sahi tareeqe se karna behad zaroori hai. Kyon ke agar ghusl na hogi. Insan napaak rahega aur us halaat mein na to Namazein qubool hongi na Qur’an ki tilawat qubool hogi. Zarur dekhiye→ Rabbighfir Warham Wa Anta Khairur Rahemeen

Aur insan gunahgar hoga. Kyon ke ALLAH ne hume samajh aur salahiyat di hai ki hum, padhe aur ilm hasil kar sake.

Ilm hasil karna har musalman par farz hai. Isliye Deen aur Hadees ki roshni mein hume, humesha cheezon ki haqeeqat dhoondi chahiye.

Taaki hashr mein ALLAH humse raazi ho jaye Insha ALLAH.

ALLAH hume nek raste pe chalne ki toufeeq de, Ilm de, hidayet de Ameen ya Rabbul ‘Alameen.

Agar apko post pasand aye to apno se share zarur kijiyega.

Join ya ALLAH Community!

FaceBook→ yaALLAHyaRasul

Subscribe to YouTube Channel→ yaALLAH Website Official

Instagram par Follow Kijiye instagram.com/yaALLAH.in

2 Comments

  1. Talat Siddique on said:

    assalamualikim Mujhe wazifa karne ki ijazat dijiye mere comment ko reply dijiye mujhe bahut jarurat hai bhai mai apni pasand ki shaadi karna chahti hu mera waha se rishta ajaye sab raazi ho jaaye unke.gharwale rishta lekar.aaye

Apne sawal yahan puchiye!